ନଳବଣ୍ଟା ଗ୍ରାମରେ ଥିବା ବେଆଇନ ବାଣ କାରଖାନାରେ ପୋଲିସ ଚଢ଼ାଉ, ୭୦ଲକ୍ଷ ଟଙ୍କାର ବାଣ ସହ ସରଂଜାମ ଜବତ, ୩ଜଣ ଗିରଫ

ଆସିକା ନିକଟସ୍ଥ ନଳବଣ୍ଟା ଗ୍ରାମରେ ଥିବା ବେଆଇନ ବାଣ କାରଖାନାରେ ପୋଲିସ ତରଫରୁ ଚଢ଼ାଉ କରାଯାଇ ୭୦ଲକ୍ଷ ଟଙ୍କାର ବାଣ ସହ ସରଂଜାମ ଜବତ କରାଯାଇଛି । ଏଥିସହ ୩ଜଣ ଅଭିଯୁକ୍ତ ନଳବଣ୍ଟାର ସଂତୋଷ ପାଢ଼ୀ, ଜୀବନ ସେଠୀ ଓ ବିପ୍ର ଚରଣ ସେଠୀଙ୍କୁ ଗିରଫ କରାଯାଇଥିବା ଥାନା ଅଧିକାରୀ ପ୍ରଶାନ୍ତ କୁମାର ସାହୁ ସୁଚନା ଦେଇଛନ୍ତି । ପୂର୍ବରୁ ନଳବଣ୍ଟାରେ ବାଣ ବିସ୍ଫୋରଣ ଘଟି ବହୁ ଧନଜୀବନ ନଷ୍ଟ ହୋଇଥିବା ଯୋଗୁଁ ସୋମବାର ପୋଲିସ ଓ ପ୍ରଶାସନିକ ଅଧିକାରୀଙ୍କ ପକ୍ଷରୁ ନଳବଣ୍ଟାର ୫ଟି ସ୍ଥାନରେ ଚଢ଼ାଉ କରାଯାଇଥିଲା । ଏହି ବାଣ ଜବତ କରାଯିବା ପରେ ୭ଟି ଭ୍ୟାନ୍ରେ ବୋଝେଇ କରି ପୋଲିସ ଏହାକୁ ଜବତ କରିଥିଲା । ଏତେ ପରିମାଣର ବାଣ ଜବତ କରାଯିବା ଘଟଣା ଆଗରୁ କେବେ ଦେଖିବାକୁ ମିଳିନଥିଲା । ଏହି ଚଢ଼ାଉ ସମୟରେ ଉପଖଣ୍ଡ ପୋଲିସ ଅଧିକାରୀ ସୁର୍ଯ୍ୟମଣୀ ପ୍ରଧାନ, ଆସିକା ଅତିରିକ୍ତ ତହସିଲଦାର ଆଶୁତୋଷ ସୌରଭ କରଙ୍କ ସମେତ ଗୋଟିଏ ପ୍ଲାଟୁନ ଫୋର୍ସ ସାମିଲ ହୋଇଥିଲେ ।