କୁକୁଡ଼ା ଫାର୍ମରେ ନକଲୀ ଦେଶୀ ମଦ କାରାଖାନା ଠାବ

ଦିଗପହଣ୍ଡି ଥାନା ଅନ୍ତର୍ଗତ କୈଠଖଣ୍ଡି ଗ୍ରାମ ପଂଚାୟତ ବୀରପଟଣା ଗ୍ରାମସ୍ଥିତ ଏକ କୁକୁଡ଼ା ଫାର୍ମ ଉପରେ ଚଢ଼ାଉ କରାଯାଇ ଏକ ନକଲୀ ଦେଶୀ ମଦ କାରାଖାନା ଠାବ କରାଯାଇଛି । ଏଠାରୁ ୪୬ଟି କାର୍ଟୁନରେ ଭର୍ତ୍ତି ହୋଇଥିବା ବହୁ ନକଲୀ ବିଦେଶୀ ମଦ ବୋତଲ, ସ୍ପିରିଟ, ମେସିନ, ଲେବୁଲ, ପୁରୁଣା ଖାଲି ବୋତଲ, ଠିପି ଓ ରସାୟନ ସାମଗ୍ରୀ ପୋଲିସ ଜବତ କରିଥିଲା । ଏ ସଂକ୍ରାନ୍ତରେ ପୋଲିସ ୪ଜଣଙ୍କୁ ଅଟକ ରଖି ଜେରା ଚଳାଇଛି । ମଦ ବୋଝେଇ ହେଉଥିବା ଏକ ଅଟୋକୁ ମଧ୍ୟ ପୋଲିସ ଜବତ କରିଛି । ଅଟକଙ୍କ ମଧ୍ୟରେ ଭୀଷ୍ମଗିରିର ହୃଷିକେଶ ଗୌଡ଼, ତାରାସିଂର ପ୍ରଦୀପ ସାହୁ, ଫୁଲ ସୁନ୍ଦରୀ ସାହିର ଟୁଟୁ ଦାସ ଓ ପେଣ୍ଡୁରାବାଡ଼ି ଗ୍ରାମର ଦଣ୍ଡପାଣି ଡାକୁଆ ପ୍ରମୁଖ ରହିଛନ୍ତି । ଅତିଶିଘ୍ର ଏହି ଘଟଣାରେ ବ୍ରହ୍ମପୁରର ସଂତୋଷ ସ୍ୱାଇଁଙ୍କୁ ଗିରଫ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି । ଏଥିନେଇ ପୋଲିସ ଅଧିକ ତଦନ୍ତ ଜାରି ରଖିଛି ।