କରୋନା କଟକଣାକୁ ଦୃଷ୍ଟିରେ ରଖି ବହୁ ଜନସାଧାରଣ ଅନ୍ୟ ରାଜ୍ୟରୁ ସମୁଦ୍ର ପଥ ଦେଇ ଜାହାଜରେ ଚାଲିଆସୁଛନ୍ତି, ମେରାଇନ ଥାନା ପୋଲିସ ପକ୍ଷରୁ ସତର୍କତା ଅବଲମ୍ବନ ।

ଆସନ୍ତା ୩ ତାରିଖ ପର୍ଯ୍ୟନ୍ତ କରୋନା କଟକଣା ଲାଗି ରହିବ । ଏହାକୁ ଦୃଷ୍ଟିରେ ରଖି ବହୁ ଜନସାଧାରଣ ଅନ୍ୟ ରାଜ୍ୟରୁ ସମୁଦ୍ର ପଥ ଦେଇ ଜାହାଜରେ ଚାଲିଆସୁଥିବା ଅଭିଯୋଗ ହୋଇଛି । କିଛିଦିନ ପୂର୍ବେ ଏହିପରି କିଛି ସମୁଦ୍ର ପଥଚାରୀଙ୍କୁ ଗିରିସୋଲା ପୋଲିସ ପକ୍ଷରୁ ଉଦ୍ଧାର କରାଯାଇ କ୍ୱାରେଣ୍ଟାଇନ୍ରେ ରଖାଯାଇଛି । ବର୍ତ୍ତମାନ ସମୁଦ୍ର ମଧ୍ୟରେ ଏକ ଜାହାଜରେ ଶତାଧିକ ଜନସାଧାରଣ ଆସୁଥିବା ଏକ ଭିଡିଓ ଭାଇରାଲ ହୋଇଛି । ତେବେ ବ୍ରହ୍ମପୁର ପୋଲିସ ବିଭାଗ ଓ ମେରାଇନ ଥାନା ପୋଲିସ ତରଫରୁ ସମୁଦ୍ର ପଥରେ ଆସୁଥିବା ଲୋକଙ୍କ ପ୍ରତି ସଜାଗ ଦୃଷ୍ଟି ରଖାଯାଇଛି । ସମୁଦ୍ରପଥ ଦେଇ ଯେପରି କେହି ନ ଆସିବେ ସେଥିପାଇଁ ମେରାଇନ ଥାନା ପକ୍ଷରୁ ସତର୍କତା ଅବଲମ୍ବନ କରାଯାଇଛି । ଗଂଜାମ ଏବଂ ବ୍ରହ୍ମପୁର ପୋଲିସ ଜିଲ୍ଲା ଅଧିନରେ ଥିବା ୨ଟି ମେରାଇନ ଥାନାର କର୍ମଚାରୀମାନେ ଦିନରାତି ଏଥିପ୍ରତି ଦୃଷ୍ଟିଦେବା ସହ ଜଗି ରହିଛନ୍ତି । ଏଥିପାଇଁ ମତ୍ସ୍ୟଜୀବୀମାନଙ୍କୁ ମଧ୍ୟ ସଚେତନ କରାଯାଇଛି । ବାହାର ଲୋକ ଯଦି କେହି ସମୁଦ୍ରପଥ ଦେଇ ଆସନ୍ତି ତେବେ ପୋଲିସକୁ ଖବର ଦେବାପାଇଁ କୁହାଯାଇଛି ।