କରୋନା କଟକଣା, ବାହାରେ ବୁଲୁଛନ୍ତି ବହୁ ଅମାନିଆ, ମହାନଗରର ବିଭିନ୍ନ ସ୍ଥାନରେ ଏମାନଙ୍କୁ ନଜର ରଖିଛି ଡ୍ରୋନ କ୍ୟାମେରା, ନିୟମ ଭାଙ୍ଗିଲେ ପୋଲିସ କାର୍ଯ୍ୟାନୁଷ୍ଠାନ ।

କରୋନା କଟକଣା ଲାଗି ରହିଥିବାବେଳେ ବ୍ରହ୍ମପୁରରେ ବହୁ ଅମାନିଆ ଲୋକ ବିନା କାରଣରେ ବାହାରେ ବୁଲୁଥିବା ଅଭିଯୋଗ ହୋଇଛି । ଏହାକୁ ଦୃଷ୍ଟିରେ ରଖି ବ୍ରହ୍ମପୁର ଏସ୍ପି ପିନାକ ମିଶ୍ରଙ୍କ ନିର୍ଦେଶକ୍ରମେ ମହାନଗରର ବିଭିନ୍ନ ସ୍ଥାନରେ ଡ୍ରୋନ କ୍ୟାମେରା ଦ୍ୱାରା ଆକାଶ ମାର୍ଗରୁ ଫଟୋ ଉତ୍ତୋଳନ କରାଯାଉଛି । ଏହାଦ୍ୱାରା ଜନସାଧାରଣଙ୍କ ଗିତିବିଧି ଲକ୍ଷ୍ୟ କରାଯାଇ ତୁରନ୍ତ ପୋଲିସ ବିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ଶୁକ୍ରବାର ଅପରାହ୍ନରେ ଟ୍ରାଫିକ ଡିଏସ୍ପି ସାର୍ଥକ ରାୟଙ୍କ ଉପସ୍ଥିତିରେ ଆଂକୁଲି ଓ ଶିଳ୍ପାଂଚଳ ଅଂଚଳରେ ଡ୍ରୋନ କ୍ୟାମେରା ଦ୍ୱାରା ଫଟୋ ଉତ୍ତୋଳନ କରାଯାଇଥିଲା । କରୋନାରୁ ରକ୍ଷା ପାଇବାକୁ ହେଲେ କୌଣସି ଜନସାଧାରଣ ଘରୁ ନ ବାହାରିବାପାଇଁ ପରାମର୍ଶ ଦିଆଯାଇଛି । ତେବେ କେତେକ ସ୍ଥାନରେ ପିଲା ଓ ଯୁବକମାନେ କ୍ରିକେଟ ଖେଳୁଥିବାବେଳେ ଆଉ କେତେକ ସ୍ଥାନରେ ଅଯଥାରେ ମେଳି ବାନ୍ଧି ଗପସପ କରୁଥିବା ଲକ୍ଷ୍ୟ କରାଯାଇଛି । ତେଣୁ ଏ ସବୁରୁ ନିବୃତ୍ତ ରହିବାପାଇଁ ପୋଲିସ ବିଭାଗ ପକ୍ଷରୁ ପରାମର୍ଶ ଦିଆଯାଇଛି । ଯଦି ବିନା କାରଣରେ କୌଣସି ସ୍ଥାନରେ ଭୀଡ଼ କରାଯାଏ ତେବେ ଆଇନଗତ ପଦକ୍ଷେପ ଗ୍ରହଣ କରାଯିବ ବୋଲି କୁହାଯାଇଛି ।