ମାର୍ଚ୍ଚ ୨୨ ତାରିଖ ଜନତା କର୍ଫ୍ୟୁକୁ ମୁଖ୍ୟମନ୍ତ୍ରୀଙ୍କ ସମର୍ଥନ, ସମସ୍ତ ଓଡ଼ିଶାବାସୀ ଏଥିରେ ସହଯୋଗ କରିବାକୁ ନିବେଦନ, ୨୨ ମାର୍ଚ୍ଚ ସକାଳ ୭ଟାରୁ ୨୯ ମାର୍ଚ୍ଚ ରାତି ୯ଟା ପର୍ଯ୍ୟନ୍ତ ୫ଟି ଜିଲ୍ଲା ଓ ୮ଟି ସହର ଲକ୍ ଡାଉନ ।

ମାର୍ଚ୍ଚ ୨୨ ତାରିଖ ଜନତା କର୍ଫ୍ୟୁକୁ ମୁଖ୍ୟମନ୍ତ୍ରୀ ନବୀନ ପଟନାୟକ ସମର୍ଥନ କରି ସମସ୍ତ ଓଡ଼ିଶାବାସୀ ଏଥିରେ ସହଯୋଗ କରିବାପାଇଁ ନିବେଦନ କରିଛନ୍ତି । ବିଶ୍ୱବ୍ୟାପୀ ଏହି କରୋନା ଜାରି ରହିଥିବା ଯୋଗୁଁ ସମସ୍ତେ କର୍ଫ୍ୟୁରେ ସାମିଲ ହେବା ଉଚିତ ବୋଲି ସେ କହିଛନ୍ତି । କେବଳ ସଚେତନ ଦ୍ୱାରା ହିଁ ଏହାକୁ ରୋକାଯାଇପାରିବ । ଘରେ ରହିଲେ ଆପଣ ଓ ଆପଣଙ୍କ ପରିବାର ସୁରକ୍ଷିତ ରହିପାରିବେ । ତେଣୁ ଏହି ଭୁତାଣୁକୁ ଆପଣଙ୍କ ଘରେ ପଶିବାକୁ ଦିଅନ୍ତୁ ନାହିଁ ବୋଲି ମୁଖ୍ୟମନ୍ତ୍ରୀ ପଟନାୟକ ଏକ ଭିଡିଓ ମାଧ୍ୟମରେ ସମସ୍ତଙ୍କୁ ଆହ୍ୱାନ ଦେଇଛନ୍ତି । ଏପରି ପାଳନ କରି ଚୀନ୍ର ଉହାନ୍ ପ୍ରଦେଶ କରୋନା ଭୁତାଣୁକୁ ହରାଇଦେଇପାରିଛି ବୋଲି ସେ କହିବା ସହ ବର୍ତ୍ତମାନ ସମୟ ଆସିଛି, ଆମେ ମଧ୍ୟ ଏହି କୌଶଳକୁ ଅବଲମ୍ବନ କରିବା ଉଚିତ ବୋଲି ସେ ପ୍ରକାଶ କରିଛନ୍ତି । ଆଗାମୀ ସପ୍ତାହ ପାଇଁ ଏହା ଖୁବ୍ ଗୁରୁତ୍ୱପୁର୍ଣ୍ଣ । ଗତ କିଛିଦିନ ମଧ୍ୟରେ ବିଦେଶରୁ ପ୍ରାୟ ୩ହଜାରରୁ ଅଧିକ ଲୋକ ଓଡ଼ିଶାକୁ ଫେରିଛନ୍ତି । ସେମାନଙ୍କ ମଧ୍ୟରୁ ୭୦ ପ୍ରତିଶତ ହେଉଛନ୍ତି ଗଂଜାମ, ଖୋର୍ଦ୍ଧା, କଟକ, କେନ୍ଦ୍ରାପଡ଼ା ଓ ଅନୁଗୁଳ ଜିଲ୍ଲାର । ତେଣୁ ୨୨ ମାର୍ଚ୍ଚ ରବିବାର ସକାଳ ୭ଟାରୁ ୨୯ ମାର୍ଚ୍ଚ ରାତି ୯ଟା ପର୍ଯ୍ୟନ୍ତ ଏହି ୫ଟି ଜିଲ୍ଲାର ସବୁ ସହର ଓ ଗ୍ରାମ ସହିତ ସମ୍ବଲପୁର, ଝାର୍ସୁଗୁଡ଼ା, ବାଲେଶ୍ୱର, ରାଉରକେଲା, ଭଦ୍ରକ,ପୁରୀ, ଯାଜପୁର ରୋଡ଼ ଏବଂ ଯାଜପୁର ଟାଉନ୍ରେ ଲକ୍ ଡାଉନ କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିବା ସେ କହିଛନ୍ତି । ଏହି ଲକ୍ ଡାଉନ୍ ସମୟରେ କେବଳ ବସ,ଟ୍ରେନ୍ ଓ ବିମାନ ସେବା ସହିତ ସୌଦା ଦୋକାନ, ପରିବା, ମାଛ, ମାଂସ, ଅଣ୍ଡା, ଚିକେନ, ପେଟ୍ରୋଲ ପମ୍ପ ଓ ଔଷଧ ଦୋକାନ ଖୋଲା ରହିବ । ସେହିପରି ଡାକ୍ତରଖାନା, ବ୍ୟାଙ୍କ, ମୁନିସିପାଲିଟି ସେବା, ପୋଲିସ, ଅଗ୍ନିଶମ ସେବା, ଓଡ୍ରାଫ, ପାନୀୟ ଜଳ ଓ ବିଦ୍ୟୁତ୍ ସେବା ଆଦି ଜାରି ରହିବ । ଏଥିସହ ପ୍ରଶାସନିକ କାର୍ଯ୍ୟାଳୟଗୁଡ଼ିକ ମଧ୍ୟ ଖୋଲା ରହିବ ବୋଲି ସେ କହିଛନ୍ତି । ଲୋକଙ୍କ ସ୍ୱାର୍ଥ ପାଇଁ ସରକାର କରିଥିବା ଏହି କଟକଣାକୁ ଯିଏ ଭାଂଗିବାକୁ ଚେଷ୍ଟା କରିବ ସେମାନଙ୍କ ବିରୁଦ୍ଧରେ କଠୋର ପଦକ୍ଷେପ ନେବାପାଇଁ ପୋଲିସକୁ ନିର୍ଦେଶ ଦିଆଯାଇଥିବା ସେ କହିଛନ୍ତି । ତେଣୁ ସମସ୍ତ ଜନସାଧାରଣ ନିଜ ନିଜ ଘରେ ସୁରକ୍ଷିତ ରହିଲେ ହିଁ ଏ ଯୁଦ୍ଧ ଜିତିପାରିବା ବୋଲି ମୁଖ୍ୟମନ୍ତ୍ରୀ ପଟନାୟକ ସୁଚନା ଦେଇଛନ୍ତି ।