ଜିଲ୍ଲା ପ୍ରଶାସନର ଅବହେଳାରୁ ଗଂଜାମ ଚାଷୀଙ୍କ ଧାନ କିଣାରେ ଅବ୍ୟବସ୍ଥା ହେଉଥିବା ଋଷିକୂଲ୍ୟା ରୟତ ମହାସଭା ପକ୍ଷରୁ ଅଭିଯୋଗ, ତୁରନ୍ତ ପଦପେକ୍ଷ ଗ୍ରହଣ କରିବା ଦାବି ।

ଜିଲ୍ଲା ପ୍ରଶାସନର ଅବହେଳାରୁ ଗଂଜାମ ଚାଷୀଙ୍କ ଧାନ କିଣାରେ ଅବ୍ୟବସ୍ଥା ହେଉଥିବା ଋଷିକୂଲ୍ୟା ରୟତ ମହାସଭା ପକ୍ଷରୁ ଅଭିଯୋଗ କରାଯାଇଛି । ମଂଗଳବାର କମାପଲ୍ଲୀ ପୁର୍ତ୍ତ ବିଭାଗ ଡାକ ବଂଗଳା ପରିସରରେ ମହାସଭା ତରଫରୁ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏହି ଅଭିଯୋଗ କରାଯାଇଥିଲା । ଏହି ଅବସରରେ ସଭାପତି ତ୍ରିନାଥ ବିଶ୍ୱାଳ, ସମ୍ପାଦକ ସୀମାଂଚଳ ନାହାକ, ପୋଲସରା ବ୍ଲକ୍ ସଭାପତି ସତ୍ୟବାନ ପ୍ରଧାନ, ସଂଯୋଜକ ସୀତାରାମ ପାଣିଗ୍ରାହୀ, ଚାଷୀନେତା ସଂତୋଷ କୁମାର ସାହୁ, ଉପଦେଷ୍ଟା ରବି ରଥ, ଅଭିମନ୍ୟୁ ପାତ୍ର, କିଶୋର ପଣ୍ଡା ପ୍ରମୁଖ ଉପସ୍ଥିତ ଥିଲେ । ଗଂଜାମ ଜିଲ୍ଲା କୃଷି ପ୍ରଧାନ ଜିଲ୍ଲାଭାବେ ବେଶ ପରିଚିତ । ଜିଲ୍ଲାର ୭୫ ଭାଗରୁ ଅଧିକ ପରିବାର କୃଷି ଉପରେ ନିର୍ଭରଶୀଳ ଅଟନ୍ତି । ଜିଲ୍ଳାରେ ମାତ୍ର ୩୫ ଭାଗ ଜମିକୁ ଜଳ ସେଚନ ସୁବିଧା ଥିବାବେଳେ ଆଉ ସବୁ ଜମିକୁ ଜଳ ଯୋଗାଇ ଦିଆଯାଇନଥିବା ଏଠାରେ ଅଭିଯୋଗ କରାଯାଇଥିଲା । ଫଳରେ ଚାଷ ହୋଇପାରୁନଥିବା କୁହାଯାଇଥିଲା । ଏହାଯୋଗୁଁ ୫ଲକ୍ଷରୁ ଅଧିକ କୃଷକ ଓ କୃଷି ଶ୍ରମିକ କାମଧନ୍ଦା ନପାଇ ବାଧ୍ୟ ହୋଇ ପେଟ ପୋଶିବା ପାଇଁ ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଉଥିବା ଏଠାରେ କୁହାଯାଇଥିଲା । କୃଷିଜାତ ପଦାର୍ଥର ମାର୍କେଟିଂର ସୁବିଧା ନଥିବାରୁ ବିଭିନ୍ନ ଫସଲର ଅଭାବୀ ବିକ୍ରି ଯୋଗୁଁ ଗଂଜାମ ଜିଲ୍ଲାର ଚାଷୀ ପ୍ରତିବର୍ଷ କ୍ଷତି ସହୁଥିବା ଏଠାରେ ଅଭିଯୋଗ କରାଯାଇଥିଲା । ଶୀତଳ ଭଣ୍ଡାର କିମ୍ବା ମାର୍କେଟିଂ ୟାର୍ଡର କୌଣସି ସୁବିଧା କରାଯାଇନାହିଁ । ପ୍ରତି ୨ ବର୍ଷକୁ ଥରେ ପ୍ରାକୃତିକ ବିପର୍ଯ୍ୟୟ ଯୋଗୁଁ ବାରମ୍ଭାର ଫସଲ ନଷ୍ଟ ହେବା ଫଳରେ ଚାଷୀଙ୍କ ଆର୍ଥିକ ମେରୁଦଣ୍ଡ ଭାଂଗି ଯାଉଛି । ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ଜଳ ସେଚନ ଏବଂ ମାର୍କେଟିଂର ସୁବିଧା ନାହିଁ । କେବଳ କାଳିଆ ବଳିଆ ଯୋଜନାରେ କେନ୍ଦ୍ର ଓ ରାଜ୍ୟ ସରକାର ଚାଷୀଙ୍କୁ ଭଣ୍ଡେଇ ଚାଲିଥିବାବେଳେ ଚାଷୀଙ୍କ ବିକାଶ ପ୍ରତି କେହି ଦୃଷ୍ଟି ଦେଉନଥିବା ଏଠାରେ ଅଭିଯୋଗ କରାଯାଇଥିଲା । ପ୍ରତିବର୍ଷ ଜିଲ୍ଲାରେ ଧାନ କିଣାରେ ଅଭାବୀ ବିକ୍ରିର ଶିକାର ହେଉଛନ୍ତି । ଚଳିତ ବର୍ଷ ୧ଲକ୍ଷ ୩୪ ହଜାର ଚାଷୀଙ୍କ ଧାନ କିଣିବାପାଇଁ ପଂଜି କରଣ ହୋଇଥିବାବେଳେ ୨ ମାସରେ ମାତ୍ର ୬୫ହଜାର ଚାଷୀଙ୍କ ଧାନ କିଣାଯାଇଥିବା ଏଠାରେ କୁହାଯାଇଥିଲା । ତେଣୁ ତୁରନ୍ତ ସବୁ ପଂଜିକୃତ ଚାଷୀଙ୍କ ଧାନ କିଣିବା ପାଇଁ ଏଠାରେ ଦାବି କରାଯାଇଥିଲା ।