ଲୁଗା ବ୍ୟବସାୟୀ ଏଜେଣ୍ଟଙ୍କଠାରୁ ୫୦ ଲକ୍ଷ ଲୁଟ ଘଟଣାରେ ବଡ଼ବଜାର ଥାନା ପୋଲିସ ପକ୍ଷରୁ ୫ଜଣିଆ କୁଖ୍ୟାତ ଡକାୟତ ଗ୍ୟାଙ୍ଗ ଗିରଫ, ୩୬ଲକ୍ଷ ୭୭ ହଜାର ଟଙ୍କା ଜବତ ।

ବ୍ରହ୍ମପୁର : ବଡ଼ବଜାର ଥାନା ପୋଲିସ ପକ୍ଷରୁ ଏକ ୫ଜଣିଆ କୁଖ୍ୟାତ ଡକାୟତ ଗ୍ୟାଙ୍ଗକୁ କାବୁ କରାଯାଇଛି । ଏଥିନେଇ ଗୁରୁବାର ବ୍ରହ୍ମପୁର ଏସ୍ପି ପିନାକ ମିଶ୍ର ଏକ ସାମ୍ବାଦିକ ସମ୍ମିଳନୀରେ ଏହି ସୁଚନା ଦେଇଥିଲେ । ୫ଜଣଙ୍କ ମଧ୍ୟରେ ଲାଂଜିପଲ୍ଲୀ ଢୀପ ସାହିର ସୁନୀଲ ବିଶୋୟୀ, ରାମ ନଗର ତୃତୀୟ ଲାଇନର ମୂନା ମହାରଣା, ମଥୁରା ନଗରର ପ୍ରତୀକ ଦଳେଇ, ପାତ୍ରପୁର କଂକୋରଡ଼ା ଗ୍ରାମର ରାଜା ଚୌଧୁରୀ ଏବଂ ଭାବିନୀ ପୁରର ନିରଂଜନ ଗୌଡ଼ ରହିଛନ୍ତି । ସେମାନଙ୍କଠାରୁ ପୋଲିସ ନଗଦ ୩୬ଲକ୍ଷ ୭୭ ହଜାର ଟଙ୍କା, ୪୭ ହଜାର ଟଙ୍କା ଅଳଂକାର, ୭ଟି ମୋବାଇଲ୍ ଜବତ କରିଛି । ଏହି ଡକାୟତମାନଙ୍କୁ କୋର୍ଟ ଚାଲାଣ କରାଯିବା ପରେ ସେମାନଙ୍କ ଜାମିନ ନାମଂଜୁର ହେବାରୁ ସମସ୍ତଙ୍କୁ ଜେଲ୍ ହାଜତକୁ ପଠାଇଦିଆଯାଇଛି । ପ୍ରକାଶଥାଉକି ଗତ ମାସ ଏକ ଲୁଗା ବ୍ୟବସାୟୀ ଏଜେଣ୍ଟଙ୍କଠାରୁ ୫୦ ଲକ୍ଷ ଲୁଟ ଘଟଣାରେ ଏପରି ଗିରଫ କରାଯାଇଥିବା ଜଣାପଡିଛି ।